Эх орныхоо төлөө тэмцсэн залуусыг цагдан хорьж эхэллээ!!!

“Гал үндэстэн” холбооны Удирдах зөвлөлийн гишүүн Г.Болдбаатарыг өнөөдөр өглөө Сүхбаатар дүүргийн цагдаагийнхан гэрээс нь албадан баривчилсан юм. Тэрбээр тус дүүргийн цагдаагийн хэлтэст өлсгөлөн зарлахаа дөнгөж сая мэдэгджээ. Г.Болдбаатарыг тодорхой шалтгаангүй баривчилсан нь санаатай хийж буй үйлдэл гэж холбооны гишүүд дэмжигчид нь үзэж байгаа юм. Тэрбээр Сэлэнгэ аймагт нутаг чөлөөлөх ажиллагаанд оролцож яваад бие нь муудсан учир хэд хоногийн өмнө нийслэлд ирсэн байжээ.Өнгөрсөн шөнө Өвөрхангай аймгаас баривчлагдаж ирсэн “Гал үндэстэн” холбооны Удирдах зөвлөлийн гишүүн Ц.Мөнхбаяр, н.Төмөрбаатар нарыг Улсын мөрдөн байцаах газраас цагдан хорих 461 дүгээр хорих анги руу ачсан байна. Харин Сүхбаатар дүүргийн цагдаагийн хэлтэст саатуулагдаад байсан М.Баатархуягийг дөнгөж сая тэндээс авч явсан бөгөөд түүнийг хаашаа ачсаныг иргэний хөдөлгөөнийхөн мэдээгүй байна. Ямартай ч Өвөрхангай аймгийн Уянга, Зүүн Баян Улаан сумын заагт үйл ажиллагаа явуулж байсан “Гурван тамга” компанийн усан бууны генераторыг буудсан Ц.Мөнхбаяр нарт эрүүгийн хэрэг үүсгэн цагдан хорьж байгаа бололтой.