Надад ЭРХ ЧӨЛӨӨ хэрэггүй...

Монголчууд бид хүний эрх чөлөөг эрхэмлэн дээдлэн явсаар ирсэн ард түмэн билээ. Гэхдээ одоо цагийн "ЭРХ ЧӨЛӨӨ" гээч мэдээж биш. Уул нь "эрх чөлөө" гэдэг зүйл бол ертөцийн хуулинд захирагдахыг хэлнэ. Хууль гэдгийг ихэнх хүмүүс Хорио цээр, хязгаарлалт гэсэн талаас нь ойлгодог. Энэ бол буруу юм.
Хууль гэдгийг зөв амьдрах, эрх чөлөөг баталгаажуулах, зөв боломжийг ашиглан оршихуйн хуулинд захирагдаж эв нэгдэлтэй, үндэс угсаатай, ёс журамтай байхад зориулж үйлдэж, мөрдөж байх зүйл гэдгийг ойлгох хэрэгтэй. Мөн хуулийн үндсэн гол тулгуур бол Үндэстний язгуур эрх ашиг байх ёстой. Тиймдээ ч улс үндэстэн бүрийн хууль өөрийн гэсэн өнгө төрхтэй байдаг.
Чухам үүгээр л энэхүү хууль зөв үү үгүй юу гэдгийг ялгаж салгаж болно.

Гэтэл одоогийн нийгэмд эрх чөлөө гэдгийг дураар дургих, үндэстний эрх ашгийг үл хүндэтгэн, өвөг дээдсийнхээ сургаалийг үл ухамсарлан өөрийн дураар чалчиж, тэнэгүүдийн бичсэн хуулийг тэнгэрийн хууль хэмээн зүтгэж хар амиа хичээж, хувийнхаа эрх ашгийг дээдлэхийг хэлнэ хэмээн ойлгож байна.

Ертөнцийн зүй тогтол, түүний харилцан үйлчлэл, оршихуйн мөн чанарыг хүлээн зөвшөөрч хүн өөрийн хэр хэмжээг мэдэрч, түүн дор хичээн амьдрахыг Өвгөд дээдэс маань бидэнд сургамжлан өвлүүлсэн.
Гэтэл өнөөдөр Монголчууд бидний сонгосон төрийн төлөөлөл, түмний итгэлийг хугалсан улс төрчид нэртэй хулгайч нар эрх чөлөө, ардчилал нэрээр

Харь гүрний хуулийг
Хөх Монголдоо тулгаж
Хөх өвгөдийн хуулийг
Хөсөр газар хаяж
Дээрээ тэнгэргүй мэт
Дэргэдээ сахиусгүй мэт
Ээжий аавгүй мэт
Эрдэнэт хөвүүнгүй мэт
Өнөөдрөөр Амьдрал дуусах мэт
Өчигдрөөр Түүх дууссан мэт
Харсан бүгдээ өнгөөр ялгаж
Хавьтсан бүгдээ мөнгөөр худалдаж
Эх орноо зарж
Элгэн түмнээ золиослож
Харь түмнийг шүтэж
Хар толгойгоо зөвтгөж
Үйлийн үрийг үгүйсгэж
Үндэс угсаагаа мартаж
Уулыг тал болгож
Талыг там болгож
Усыг эргүүлж
Ухаант түмнээ хордуулж
Аймаг хошуугаар талцуулж
Алт мөнгөөр уралдуулж
Харийн шашинд сөхрүүлж
Харанхуй тамд унагаж байна
Өлгийдэх үрсийг хэвлийд нь
Өтгөс буурлыг өргөөнд нь
Тамласаар байгаад алж байна
Тарчилгасаар байгаад хөнөөж байна.
Албан өндөр тушаалаа
Авилгал олох боломж гэж
Архи согтууруулах ундаагаа
Мөнгө олох боломж гэж
Хувийн өмчөөрөө
Монгол түмнийг хордуулж
Хувийн өчүүхэн эрх ашгаараа
Монгол түмнийг дарангуйлж
Олон үзэлд төөрүүлж
Олз хайж тэнүүчилж
Түмэн зорилгод тарааж
Төр улсаа сөхрүүлж
Цөөхөн хэдэн Монголчуудыг
Зөнд нь гартал булингартуулж
Төрөлх эх орондоо
Төөрсөн мэт золбинтуулж
Адгийн хийсэн бүгдээ
Ардчилал хэмээн тунхаглаж
Эх захгүй завхралаа
Эрх чөлөө хэмээн тунхаглаж байна.

ЭНЭ ЭРХ ЧӨЛӨӨ ГЭЖ ҮҮ? ИЙМ ЭРХ ЧӨЛӨӨ БИДЭНД ХЭРЭГТЭЙ ГЭЖ ҮҮ?

S.Bataa 2011